Skip to main content

ЛЕЙЛЕКНИНЪ БАХШЫШЫ

Бир заманда бар экен, бир заманда ёкъ экен. Бир факъыр койлю яшай экен. Озюнинъ бир зерре топрагъында гедже-куньдюз чалышып, алгъан берекетинен кечине экен.

Бир кунь озь тарласында чалышкъанда, лейлекни коре. Къувана факъыр. Лейлек хайыр кетирген къуштыр. Амма учкъан къуш апансыздан таш киби ерге тюше. Факъыр чапып барса, къушнынъ къанаты къырылгъан.

Койлю лейлекни эвге алып кете ве къанатыны чырышлап, тедавийлемеге башлай. Бир къач вакъыттан лейлек тюзеле ве факъыр оны чыкъарып йибере.

Баарьде койлю сабан сюргенде, башы тёпесинде шу лейлек учып кече ве учь къарпыз урлугъы ташлай.

Факъыр шу урлукъларны сача, оларны яз бою сувара, чапалай. Къарпызлар балабан оселер. Бунъа къувангъан факъыр пишкен къарпызларны тарладан кетире ве къомшуларыны, сойларыны зияфетке чагъыра. Бир къарпызны алып, кесмеге истей, амма емишнинъ къабугъы пек къалын экен. Ярылмай. Экинджи ве учюнджи къарпыз да ойле чыкъа. Шашып къалгъан факъыр пычакъны бар кучюнен ура, къарпыз патлай ве ичинден къырмызы ашы ерине алтын акъчалар сепиле.

Шу параларны койлю мусафирлеринен болюше. Эр кес мемнюн къайта. Эвель факъыр олгъан инсаннынъ яшайышы денъише, о яхшы яшамагъа башлай.

Шу адамнынъ бир бай ве пек куньджю къомшусы бар экен. Факъыр зенгинлешкенини корип, онъа бара ве себебини сорай. Садедиль койлю лейлек акъкъында олгъаны киби эписини айтып бере.

Бай кой четине чыкъа ве анда юва къургъан лейлекни коре. Явашчыкътан бара ве таякъ атып, лейлекнинъ аягъыны къыра. Сонъ, тесадуфен о ерде кечкен киби, сакълангъан еринден чыкъа ве къушны эвине алып кетип, тедавийлей.

Бираздан лейлекнинъ аягъы тюзеле ве о учып кете. Бай исе ондан бахшыш арзулап къала.

Бир кунь лейлек башы тёпесинден айланып, ерге эки урлукъ ташлай. Бай оларны алып сача ве берекетни беклемеге башлай. Вакъты кельген сонъ, къарпызлар орькен ата, устюнде балабан емишлери яратыла.

Бай пишкен къарпызларны эвге кетире ве къомшулар корьмесин деп, къапу-пенджерелерини къапата. Къарпызгъа пычакъ ургъанынен, о ярыла ве ичинден бир огъул кийик къурт учып чыкъа. Къуртлар байны, онынъ къорантасыны тишлемеге башлайлар. Бетлери, эль-аякълары шишкен бай къорантасы бу белядан зорнен къачып къуртула.

Сабыкъ факъыр исе озь эвинде яхшы яшай, хайрие ишлерини япа-япа болдурмай.