Moda degen şey, belli olğanı kibi, bir yerde turmay, daima deñişe. Yañı taramalar peyda ola, yañı, berberlikniñ zemaneviy tehnologiyalar yaratıla. Meselâ, sıcaq yazda yarımadamızda saçlarnı afrikalı şekilde örmek mot ola.
Adından körüne ki, bu örme çeşiti sıcaq Afrikada peyda oldı. Afrika sakinleri ufaq örme saçlarnı qadimiy zamanlardan yapalar ve özlerini oñaytlı duyalar.
Olarnıñ saçları pek sert, qalın olğanından sebep olardan birde-bir tarama yapması qıyın, atta taramaq da ağır ola.
Bizde de soñki yıllarda yazda, sıcaq avada çoq qızlarnıñ başlarında afrikalı örmelerini körmek mümkün.
Adet üzre, örmeler sintetik malzemeler: akril, yipler ve ilâhre yardımınen yapıla. Örmelerni baş ortasından yapmağa başlaylar. Olarnıñ uzunlığı ve qalınlığı çeşit ola.
Böyle şekilde saçlarnı beş künde bir yuvmaq kerek. Yuvmaq içün sünger qullanıla. Şampun saçlarnıñ tamırlarına qoyula.
Afrikalı örmeler tahminen eki buçuq ay tura. Müddet örülgen saçnıñ sayısına bağlı. Adetince olar eki yüzge yaqın ola. Korrektsiya yapqan soñ, olarnı daa bir ay tutmaq mümkün. Örmelerni papadiye çayınen sökmek yengil ola.