Skip to main content

ANAMNIÑ DUASI

Saba erte, tañ atqanda,

Dua ete anam…

Dua sözlerin tekrarlap,

Yavaşçıqtan aytam:

– Rabbim, Tañrım,

Eşit meni, aytqanımnı diñle.

Sen qudretli olğanıñnı

Balalıqtan bilem.

Meni yaqqan qayğılarnı

Kimlerge aytayım?

Tek sen bizni

Yükseklerden köresiñ er dayım…

Ber sen sabır doğmuşlarğa,

Maña, qomşularğa.

Evimizni körmey keçsin

Belâ – qara qarğa.

Er bir evge kelsin baar,

Küzde toylar olsun.

Bu dünyağa kelgen ballar

Össin ve büyüsin.

Soqurlar közü açılsın.

Sevgenler qavuşsın.

Biri-birine taş atqan

Mıtlaqa barışsın.

Er kün duağa çağırsın

Minareden mazin.

Vatandan uzaq qalğanlar

Unutmasın bizni.

Anam avuçların aça –

Rabbim, eşit meni…

Men de betimni sıypap, qoşam

Yavaşçıqtan:

– Amin!

Nuzet Ümerov