Bir zamanda bar eken, bir zamanda yoq eken. Bir faqır köylü yaşay eken. Özüniñ bir zerre toprağında gece-kündüz çalışıp, alğan bereketinen keçine eken.
Bir kün öz tarlasında çalışqanda, leylekni köre. Quvana faqır. Leylek hayır ketirgen quştır. Amma uçqan quş apansızdan taş kibi yerge tüşe. Faqır çapıp barsa, quşnıñ qanatı qırılğan.
Köylü leylekni evge alıp kete ve qanatını çırışlap, tedaviylemege başlay. Bir qaç vaqıttan leylek tüzele ve faqır onı çıqarıp yibere.
Baarde köylü saban sürgende, başı töpesinde şu leylek uçıp keçe ve üç qarpız urluğı taşlay.
Faqır şu urluqlarnı saça, olarnı yaz boyu suvara, çapalay. Qarpızlar balaban öseler. Buña quvanğan faqır pişken qarpızlarnı tarladan ketire ve qomşularını, soylarını ziyafetke çağıra. Bir qarpıznı alıp, kesmege istey, amma yemişniñ qabuğı pek qalın eken. Yarılmay. Ekinci ve üçünci qarpız da öyle çıqa. Şaşıp qalğan faqır pıçaqnı bar küçünen ura, qarpız patlay ve içinden qırmızı aşı yerine altın aqçalar sepile.
Şu paralarnı köylü musafirlerinen bölüşe. Er kes memnün qayta. Evel faqır olğan insannıñ yaşayışı deñişe, o yahşı yaşamağa başlay.
Şu adamnıñ bir bay ve pek küncü qomşusı bar eken. Faqır zenginleşkenini körip, oña bara ve sebebini soray. Sadedil köylü leylek aqqında olğanı kibi episini aytıp bere.
Bay köy çetine çıqa ve anda yuva qurğan leylekni köre. Yavaşçıqtan bara ve tayaq atıp, leylekniñ ayağını qıra. Soñ, tesadufen o yerde keçken kibi, saqlanğan yerinden çıqa ve quşnı evine alıp ketip, tedaviyley.
Birazdan leylekniñ ayağı tüzele ve o uçıp kete. Bay ise ondan bahşış arzulap qala.
Bir kün leylek başı töpesinden aylanıp, yerge eki urluq taşlay. Bay olarnı alıp saça ve bereketni beklemege başlay. Vaqtı kelgen soñ, qarpızlar örken ata, üstünde balaban yemişleri yaratıla.
Bay pişken qarpızlarnı evge ketire ve qomşular körmesin dep, qapu-pencerelerini qapata. Qarpızğa pıçaq urğanınen, o yarıla ve içinden bir oğul kiyik qurt uçıp çıqa. Qurtlar baynı, onıñ qorantasını tişlemege başlaylar. Betleri, el-ayaqları şişken bay qorantası bu belâdan zornen qaçıp qurtula.
Sabıq faqır ise öz evinde yahşı yaşay, hayriye işlerini yapa-yapa boldurmay.