Eñ azınen üç nefer bala ile oynalğan bir top oyunı.
Top qolnen atıla. Eki bala belli mesafede biri-birine qarşı tura. Ortada ise ebe (veduşçiy) olğan üçünci bala tura. Yani, o, “Orta böcek”tir. Lâkin eñ-evelâ orta böcek kim olacağını belgilemek zarur. Bunıñ içün sayım aytıla:
Leylek, leylek avada,
Yımırtası tavada.
Söyle, kelsin, ot yesin,
Ot yemese, et yesin.
Şu böcekni tez seçsin…
Böylece, “böcek” belli olğan soñ oyun başlana. Maqsat – topnı qarşıdaki arqadaşqa ataraq, onı Orta böcekke tuttırmamaq. Barıp da, Orta böcek topnı tuta bilse, bunıñnen “böcekligi” bite ve onıñ yerine topnı keregi kibi ata bilmegen bala tura. Oyun böylece devam ete. Oyunnı eki taqım olıp da oynamaq mümkün.