QURBAN BAYRAM

Musulmanlarnıñ eñ büyük bayramlarından biri – Qurban bayram. Bu künü olar sabadan bayram namazına baralar. Soñra ise evge qaytıp, bayram yapalar, musafirlikke baralar. Qartana-qartbabalarını hayırlamağa, qollarını almağa bu künü mıtlaqa kerek.

Qurban bayramı künleri daa bir adet bar – qurban çalmaq. Bu qoy ya da iri mal soymaqtır. Ne içün böyle yapıla?

Evel zamanlarda İbraim peyğamberimiz (aleyhi selâm) tüş köre. Melek kelip, oña oğlunı qurban ketirmek kerek olğanını ayta. Peyğamber Allanıñ emirini yerine ketirmege azırlana. Oğlu İsmail da Allanıñ emirine boysuna, babasına yardım ete.

Peyğamber pıçağını İsmailniñ boğazına ketirgende, pıçaq kesmey. O şaşıp, pıçağını qayağa ura, qaya açıla ve içinden qoy çıqa. Alla İbraim peyğamberniñ (a.s.)  imanı ve sabırını sınadı. Allanıñ emirini yerine ketirmege azır olğanı içün oña qurbanlıq ayvan ba-ğışlağan.

Qurban eti üç qısımğa bölüne. Biri öz qorantasına, ekincisini qomşu ve soy-soplarına, üçüncisi ise fuqare qorantalarğa, balaları olma¬ğan qartlarğa, hastalarğa darqatıla. Çünki bayram künleri er kes quvanmaq kerek.

Böyle etip, Alla musulmanlar biri-birine merhametli olmasını istegenini bildire.

Siz de, balalar, sabırlı musulman oluñız!

1.      Ana-babañıznı ürmet etiñiz ve sözlerinden çıqmañız.

2.      Sizge iş buyurğanda “uf” demeñiz, işni yapıñız.

3.      Yaqınlarıñızğa qıçırmañaz, “sağ ol”, “lütfen”, “bağışla” kibi tılsımlı sözlerni nutquñızğa kirsetiñiz.

4.      Soy-soplarıñıznı er bayram ile hayırlamağa unutmañız, qartana-qartbabalarnıñ qollarını alıñız.

5.      Eger soylarıñıznen körüşmege imkân olmasa, telefon açıñız, mektüp yazıñız ve al-hatırlarını sorañız.

6.      Vefat etken soylarıñız olsa, mezarına barıp, onı temizleñiz, ölüniñ ruhuna dua oquñız.