“Aş tatlı olsun!” degende – yengil azırlanğan yemekler aqqında ikâye etmege isteyim. Men bellesem, öz qoluñnen azırlanğan aş pek lezetli ola.
Sabalıq siz ne aşaysız? Erte turğanda yuqudan daa yahşı uyanmaysıñ ve aşamağa istemeysiñ. Amma sabalıqtan vazgeçmek olmaz. Sabalıqnı yahşı aşa! – deyler ana-babalar. Olarnıñ aytqanları pek doğru.
Sıcaq çay damlasañ, yahşı olur. İçine limon, ya da nane, bal qoşsañ – daa da yahşıdır.
Aşlardan eñ yengil azırlanğanı – buterbrod. Bu söz nemse tilinde yağlı ötmekni bildire.
Buterbrodnıñ çeşitleri çoq:
adiy – yağlı ötmekke qaşqaval, penir ya da sucuq qoyalar;
sıcaq – mikrodalğalı ya da elektrik furunnıñ yardımı ile yapıla;
çoqqatlamlı – sendviç, gamburger ve ilâhre.
Adiy buterbrod nasıl azırlana?
Ötmek tilimine sarı yağ yaqıla. Yağ, elbette, yımşaq olmaq kerek, çünki yağlaması yengil olur. Soñ üstüne, ne sevseñ, onı qoyasıñ: qaşqaval, penir, sucuq, balıq keseçigi, pişken yımırta, yeşillik, pomidor, hıyar.
Sıcaq buterbrod isteseñ, yağlı ötmek üstüne sucuq tilimi, pomidor ya da hıyar tilimi, ustten qaşqaval yerleştirip, furun içine qoy.
Çoqqatlamlı gamburger ve sendviçler adiy buterbrodlardan astı ve üstü ötmek olğanınen çeşitlene. İçine ise yahşı qavurılğan et (meselâ, tavuq, tuvar etinden küfte (kotlet), salat yaprağı, pomidor, taze ya da tuzlu hıyar tilimi, qaşqaval tilimi, qavurılğan soğan, ketçup qat-qat qoyula. Bazı gamburgerlerni öyle tolduralar ki, o, atta ağızğa sığmay.
Buterbrodlarnı azırlağanda fantaziyanen yanaşsañ, o em közüñni, em de aşqazanıñnı “quvandırır”.