Bar accı em tatlısı,
Yeşil, al em sarısı.
Tap adını, et haber,
Añlasañ, ayt bu ………..
(biber)
Özü yeşil, tomalaq,
Üstü de yolaq-yolaq.
Çölde öse, arsız,
Adıdır onıñ …………
(qarpız)
Aşhanede o daim,
Onı er kün aşayım.
Tomalaçıq, sanki top,
Laf qısqası, o………..
(qartop)
Mor melevşedir tüsü,
Aşasañ, can türküsi.
Yağdır oña bergen can,
Tez-tez ayt………………
(mor patılcan)
Tomalaq, yeşil başı,
Lezetli, deyim aşı.
Anam çoqça qullana,
Qolay adı …………..
(lahana)
Burmasını aşaysıñ,
Şifasını alasıñ.
Sofra üstünde tabaq,
Bizge kerek söz ……………..
(qabaq)
Öse ormanda, dağda,
Kimerde çayırlarda.
Aşağan onı maqtar,
Bilseñ, tez ayt, bu………….
(mantar)
Yayılıp yerde öse,
Oña yoq demez kimse.
Örnekleri pek uzun,
Adını bildik – ………..
(qavun)
Bu sebze qıp-qırmızı,
Aşağan ola razı.
Ösümlik olmasa – zor,
Tüşünip tap, bu…………..
(pomidor)
Alyana Osmanova