САЙГЪЫЛЫ ДОСТЛАР!

«Аш татлы олсун!» дегенде – енгиль азырлангъан емеклер акъкъында икяе этмеге истейим. Мен беллесем, озь къолунънен азырлангъан аш пек лезетли ола.

Сабалыкъ сиз не ашайсыз? Эрте тургъанда юкъудан даа яхшы уянмайсынъ ве ашамагъа истемейсинъ. Амма сабалыкътан вазгечмек олмаз. Сабалыкъны яхшы аша! – дейлер ана-бабалар. Оларнынъ айткъанлары пек догъру.

Сыджакъ чай дамласанъ, яхшы олур. Ичине лимон, я да нане, бал къошсанъ – даа да яхшыдыр.

Ашлардан энъ енгиль азырлангъаны – бутерброд. Бу сёз немсе тилинде ягълы отмекни бильдире.

Бутерброднынъ чешитлери чокъ:

адий – ягълы отмекке къашкъавал, пенир я да суджукъ къоялар;

сыджакъ – микродалгъалы я да электрик фуруннынъ ярдымы иле япыла;

чокъкъатламлы – сендвич, гамбургер ве иляхре.

Адий бутерброд насыл азырлана?

Отьмек тилимине сары ягъ якъыла. Ягъ, эльбетте, йымшакъ олмакъ керек, чюнки ягъламасы енгиль олур. Сонъ устюне, не севсенъ, оны къоясынъ: къашкъавал, пенир, суджукъ, балыкъ кесечиги, пишкен йымырта, ешиллик, помидор, хыяр.

Сыджакъ бутерброд истесенъ, ягълы отьмек устюне суджукъ тилими, помидор я да хыяр тилими, усттен къашкъавал ерлештирип, фурун ичине къой.

Чокъкъатламлы гамбургер ве сендвичлер адий бутербродлардан асты ве устю отьмек олгъанынен чешитлене. Ичине исе яхшы къавурылгъан эт (меселя, тавукъ, тувар этинден куфьте (котлет), салат япрагъы, помидор, тазе я да тузлу хыяр тилими, къашкъавал тилими, къавурылгъан согъан, кетчуп къат-къат къоюла. Базы гамбургерлерни ойле толдуралар ки, о, атта агъызгъа сыгъмай.

Бутербродларны азырлагъанда фантазиянен янашсанъ, о эм козюнъни, эм де ашкъазанынъны «къувандырыр».