Бар аджджы эм татлысы,
Ешиль, ал эм сарысы.
Тап адыны, эт хабер,
Анъласанъ, айт бу ………..
(бибер)
Озю ешиль, томалакъ,
Устю де ёлакъ-ёлакъ.
Чёльде осе, арсыз,
Адыдыр онынъ …………
(къарпыз)
Ашханеде о даим,
Оны эр кунь ашайым.
Томалачыкъ, санки топ,
Лаф къыскъасы, о………..
(къартоп)
Мор мелевшедир тюсю,
Ашасанъ, джан тюркюси.
Ягъдыр онъа берген джан,
Тез-тез айт………………
(мор патылджан)
Томалакъ, ешиль башы,
Лезетли, дейим ашы.
Анам чокъча къуллана,
Къолай ады …………..
(лахана)
Бурмасыны ашайсынъ,
Шифасыны аласынъ.
Софра устюнде табакъ,
Бизге керек сёз ……………..
(къабакъ)
Осе орманда, дагъда,
Кимерде чайырларда.
Ашагъан оны макътар,
Бильсенъ, тез айт, бу………….
(мантар)
Яйылып ерде осе,
Онъа ёкъ демез кимсе.
Орьнеклери пек узун,
Адыны бильдик – ………..
(къавун)
Бу себзе къып-къырмызы,
Ашагъан ола разы.
Осюмлик олмаса – зор,
Тюшюнип тап, бу…………..
(помидор)
Альяна Османова