HAQ DİNİMİZ
Dinimni, tilimni
Göñlümden sevem.
Er bir an, er daqqa
Sözler ögrenem.
Yaşasın ziyalı
Dinim ve ilim!
Biñ sene yaşasın
Anamnıñ tili!
(Leylâ oca Asanova, Bağçasaray)
ORAZA
Aç ve suvsız qalmağa –
Zorluqqa dayanmağa,
Allahqa sığınmağa
Ögretmekte oraza.
Qullarğa merhameti,
Orazanıñ rahmeti –
Biñ bir türlü ikmeti
Ögretmekte oraza.
Bildim yoqsuzlıq nedir,
Açlıq, suvsızlıq nedir,
Allahqa qullıq nedir –
Ögretmekte oraza.
Daim şükür etmege,
Haqnı şereflemege,
Çoq ibadet etmege
Ögretmekte oraza.
(İsmail Aslandan, Türkiye)
ORAZA BAYRAMI, oraza tutqanlarğa Allahın dünyadaki bahşışıdır.
Arefe künü:
– Ev ve azbar temizlenir;
– Qoqu çıqarılır, yani, lezetli, qoqulı aşlar pişirilir;
– Ğusul (boy) abdest alınır. Hamamda yuvunılır.
Bayram künü:
– Yañı ve temiz urbalar kiyilir;
– Cemaatnen camide Bayram namazı qılınır;
– Aqraba ve qomşularğa bayram hayırlanır;
– Büyüklerniñ qolu alınır (öpülir);
– Küçüklerge bahşışlar berilir;
– Ziyaretler yapılır;
– Bayram sofrası başında qoranta toplanır.