YÜNESKO tarafından 2014 senesi İsmail Gasprinskiyniñ yılı olaraq ilân etildi.
İsmail Mustafa oğlu Gasprinskiy Bağçasaray bölgesindeki Avcı köyde doğdı. İsmail başta eski musulman mektebinde, Aqmescitte gimnaziyada, Voronej ve Moskvada arbiy oquv yurtlarında tasil ala. 15 yaşında o, arbiy oquvnı taşlap, Bağçasarayğa qayta, çeşit qırımtatar mekteplerinde ve “Zıncırlı” medresesinde ocalıq yapa. Soñra, aliy bilgi almaq niyetinen Türkiyege, Parijge kete. 1876 senesi Qırımğa qaytıp, ocalıqnı devam ete.
O, halqqa bilgi bermek içün 1883 senesi milliy “Terciman” gazetasını neşir etmege başlay. “Tilde, fikirde, işte birlik” şiarı altında çıqqan bu gazeta türkiy halqlarnıñ birleşmesi, milliy medeniyetleri ösmesi oğrunda büyük hızmetler yaptı.
Tamam 100 yıl evel 1910 senesi qırımtatar balaları “Alemi-i subyan” (Balalar düñyası) gazetasını oqumağa nail olalar. O, “Terciman” gazetasına qoşma olaraq aftada eki kere çıqa edi. İçinde balalar içün masallar, şiirler, ikâyeler, halq tasili ve terbiye aqqında maqaleler basıla edi. Bugün de bu işni “Armançıq” bala mecmuası devam ete.
Halqımıznıñ ve bütün türkiy dünyanıñ atası, ulu maarifçi ve mütefikkir İsmail bey Gasprinskiyniñ ğayelerini yaş nesilimiz saqlamaq ve yaşatmaq borcludır.