Bir qaç bala kilim üstünde ayaqlarını uzatqan alda oturıp, bir daire teşkil eteler.
Yetekçi “Davul taqtım boynuma” sayımını ayta ve balalar öz arasında oyunnı başlaycaq birinci oyuncını seçeler. Seçilgen bala sayımnı ayta ve dairedeki ayaqlarnı saymağa başlay. Sayımnıñ soñundaki “qantar” sözü kimniñ ayağına tüşse, şu bala ayağını tez-tez çekip yetiştirmek kerek.
Çekip yetiştirse, demek, oyunda qala ve sayımnı aytıp, oyunnı devam ete. Eger ayağını çekip yetiştirmese, oyundan çıqa. Oyunnı ise birinci bala devam ete. Öyle etip, episi balalar oyundan çıqqance devam eteler. Soñunace qalğan bala ğalip tanıla.
Davul taqtım boynuma
Çıqtım deve yoluna,
Deve yolu bit bazar,
Bit bazada ayuv bar.
Ayuv meni qorquttı,
Qulaqların sarqıttı,
Antar-mantar,
Çek ayağıñ, qantar.