Qarlar yavdı, balaçıqlar
Pencereden qaraştı.
Ağardı taş-tolaçıqlar,
Keniş çöller yaraştı.
Keldi endi qart Qışbabay,
Accı tiye ayazı.
Sanki dersiñ alay yerde
Pamuqnıñ bem-beyazı.
Saqalı bar tizinecek,
Aruv küle közleri.
Eglendire balalarnı
Onıñ er bir sözleri:
– Aydıñız, – dey – bayırlarğa,
Çanalarnen tayarsız.
Menimnen bir oynar-küler
Yeñişlerni sayarsız.
Qaravlay o kürtüklerniñ
Köterilgen boyuna,
Allı Vatan köyleriniñ,
Cıyınları, toyuna.
Mekteplerge sürip kire,
Balalarnı hayırlay.
Er yañı yıl yolkasında
Balalarnen bir yırlay.
Tolasıy, soñ bütün tına
Qarlı ayaz boranı.
Qışbabay da pek zevqlana –
Balalarnıñ qoranı.
Osman Amit