NARGÜZ
Saar çıqnı yuta,
Belini qattı tuta,
Portaqal renk Nargüzim,
Tiymesin saña közüm.
ERILĞAN
Tüsü mor, erik degil,
Boyu bar, terek degil,
Salqım-salqım çeçegi,
Qoqulı yüzüm degil.
Onıñ adı Erılğan,
Özü baarde doğğan,
Çeçek aça pek erte,
Göñüllerni şeñ ete.
LÂLE
Çeçeklerni birer qade,
Öse olar dane-dane.
Küneş çıqsa, allansa,
Yel yelpirse, sallana.
MELEVŞE
Qoqlap seni toymayım,
Tüsüñdeñ aylanayım.
Sen de, men de qırımlı,
Vatandaşıñ olayım.
SUSAM
Çeçeklerim çoq türlü,
Mor, beyaz, ya sarılı,
Çoq balalım, göñceli,
Ucçıqlarım bürmeli.
MAMATEKE
Mamatekeçik –
Sarı ğonceçik,
Össe, kiye o
Beyahz anterçik.
Yelçik üfüre,
Appaq köpüre.
O, yelnen kene
Uça da kete.