KÜNEŞ
Küneş nurların toplay,
Ufuqlarnı o oplay,
Ayğa meraba ayta,
Yavaş evine qayta.
UYANA KÜNEŞ
Tañda uyana küneş,
İçinde altın ateş,
Kirpiklerini aça,
Yerge şavleler saça.
YAĞMUR
Tamçı-tamçı tamçılay,
Bizni yağmur qarşılay,
Er tamçınıñ türküsi,
Çoqraçıqnıñ külküsi.
YEL
Salıncaqqa yel qona,
Bala kibi sallana,
Qaval alıp qoluna,
El-alemni nağışlay.
TATLI YUQLAY
Tatlı yuqlay mışıçıq,
Yuvasında – köpeçik.
Beşikte men yuqlayım,
Kim kelse de, duymayım.
YILDIZLI YORĞAN
Qara geceni sarğan,
Parlaq yıldızlı yorğan,
Bar alemni qundaqlay,
Yerni qoynunda saqlay.
AY
Ozğarıp Küneşni Ay,
Yer yüzüni selâmlay,
Yerniñ ömür yoldaşı,
Gece onıñ sırdaşı.