ЭМИНЕ УСЕИН


КУНЕШ

Кунеш нурларын топлай,

Уфукъларны о оплай,

Айгъа мераба айта,

Яваш эвине къайта.


УЯНА КУНЕШ

Танъда уяна кунеш,

Ичинде алтын атеш,

Кирпиклерини ача,

Ерге шавлелер сача.


ЯГЪМУР

Тамчы-тамчы тамчылай,

Бизни ягъмур къаршылай,

Эр тамчынынъ тюркюси,

Чокърачыкънынъ кулькюси.


ЕЛЬ

Салынджакъкъа ель къона,

Бала киби саллана,

Къавал алып къолуна,

Эль-алемни нагъышлай.


ТАТЛЫ ЮКЪЛАЙ

Татлы юкълай мышычыкъ,

Ювасында – копечик.

Бешикте мен юкълайым,

Ким кельсе де, дуймайым.


ЙЫЛДЫЗЛЫ ЁРГЪАН

Къара геджени саргъан,

Парлакъ йылдызлы ёргъан,

Бар алемни къундакълай,

Ерни къойнунда сакълай.


АЙ

Озгъарып Кунешни Ай,

Ер юзюни селямлай,

Ернинъ омюр ёлдашы,

Гедже онынъ сырдашы.