HALQIMIZNIÑ QARAMAN QIZI ALIME ABDENNANOVA

19 yaşındaki qırım qızı Alime Abdennanova duşman astında olğan toprağımızğa yollanılğan razvedkacı edi.

Onı radiohabercinen beraber uçaqta Qırımğa, doğmuş Cermay-Qaşıq köyü yanına taşladılar. Olar ekisi zembilnen enip, kimsege körünmeyip, qartanasınıñ evine bardılar ve anda yerleştiler. Vazifeler faşist askerleri ve arbiy tehnikasınıñ sayısı, ne vaqıt ve nasıl tarafqa ketkenleri aqqında malümat toplap, ratsiyanen ştabğa bildirmek edi. Alime öz vazifesini aliy derecede becerdi, 10 ay içinde böyle çoq qıymetli 81 telegramma yolladı. Kenişçe ve tam doğru malümat toplamaq maqsadınen o, köyde yaşağan tuvğanlarından ve diger işançlı adamlardan özüne yardımcılar celp etti.

Bulardan eñ faal iştirak etkenler: Alimeniñ dayısı Abduraqip Bolatov, ocapçe Necibe Batalova, Hayrulla Mambetcanov, ağa-qardaş Cevat ve Seyfedin Mennanovlar, feldşer Vasfiye Acibayeva ediler. Cevat daa mektepni bile bitirmegen edi. Alimeniñ gruppası ne qadar saqt olıp, gizli çalışsa da, kimlerniñdir sebebinden olarnı yaqaladılar.

Eski-Qırım zindanında bulunğan başqa vatanperverlernen beraber Alimeniñ gizli razvedkacılar gruppasınıñ azalarını  Ağarmış dağı eteginde qurşunğa tizdiler. Alimeni ise Aqmescitke ketirip, ağızından bir söz alamağan soñ, sovhoz “Krasnıy” civarında qurşunladılar.

Cermay-Qaşıq köyü yoq olğan, amma qırımtatar cemaatı  öz qaramanlarını unutmay ve 1987 senesi A. Abdennanovağa  Aqmescit – Keriç yolunıñ Leninskoye köyü yanında eykel köyüldı. Bu sene noyabr ayında bu eykelniñ restavratsiyası keçirilgen soñ tantanalı açılışı olacaq. O, ölümden soñ Qızıl Bayraq ordeninen mukâfatlandı.

2014 senesi 1-sentâbr künü Qırımnıñ şanlı qızına Rusiye qaramanı unvanı berildi.

O, ölümden soñ Qızıl Bayraq ordeninen mukâfatlandı.

2014 senesi 1-sentâbr künü Qırımnıñ şanlı qızına Rusiye qaramanı unvanı berildi.