ХАЛКЪЫМЫЗНЫНЪ КЪАРАМАН КЪЫЗЫ АЛИМЕ АБДЕННАНОВА

19 яшындаки къырым къызы Алиме Абденнанова душман астында олгъан топрагъымызгъа ёлланылгъан разведкаджы эди.

Оны радиохаберджинен берабер учакъта Къырымгъа, догъмуш Джермай-Къашыкъ кою янына ташладылар. Олар экиси зембильнен энип, кимсеге корюнмейип, къартанасынынъ эвине бардылар ве анда ерлештилер. Вазифелер фашист аскерлери ве арбий техникасынынъ сайысы, не вакъыт ве насыл тарафкъа кеткенлери акъкъында малюмат топлап, рациянен штабгъа бильдирмек эди. Алиме озь вазифесини алий дереджеде беджерди, 10 ай ичинде бойле чокъ къыйметли 81 телеграмма ёллады. Кенишче ве там догъру малюмат топламакъ макъсадынен о, койде яшагъан тувгъанларындан ве дигер ишанчлы адамлардан озюне ярдымджылар джельп этти.

Булардан энъ фааль иштирак эткенлер: Алименинъ дайысы Абдуракъип Болатов, оджапче Неджибе Баталова, Хайрулла Мамбетджанов, агъа-къардаш Джеват ве Сейфедин Меннановлар, фельдшер Васфие Аджибаева эдилер. Джеват даа мектепни биле битирмеген эди. Алименинъ группасы не къадар сакът олып, гизли чалышса да, кимлернинъдир себебинден оларны якъаладылар.

Эски-Къырым зинданында булунгъан башкъа ватанперверлернен берабер Алименинъ гизли разведкаджылар группасынынъ азаларыны  Агъармыш дагъы этегинде къуршунгъа тиздилер. Алимени исе Акъмесджитке кетирип, агъызындан бир сёз аламагъан сонъ, совхоз «Красный» дживарында къуршунладылар.

Джермай-Къашыкъ кою ёкъ олгъан, амма къырымтатар джемааты  озь къараманларыны унутмай ве 1987 сенеси А. Абденнановагъа  Акъмесджит – Керич ёлунынъ Ленинское кою янында эйкель коюлды. Бу сене ноябрь айында бу эйкельнинъ реставрациясы кечирильген сонъ тантаналы ачылышы оладжакъ. О, олюмден сонъ Къызыл Байракъ орденинен мукяфатланды.

2014 сенеси 1-сентябрь куню Къырымнынъ шанлы къызына Русие къараманы унваны берильди.

О, олюмден сонъ Къызыл Байракъ орденинен мукяфатланды.

2014 сенеси 1-сентябрь куню Къырымнынъ шанлы къызына Русие къараманы унваны берильди.