Menim milliy mektebim –
Sensiz sızlay yüregim!
Sen olmasañ, qalbim tilsiz.
Olurmı kelecegim?
Menim milliy mektebim –
İlim, bilgi ocağım!
Ana tilni ögrenmesem,
Soñ peşman olacağım!
Menim milliy mektebim –
Bilgi künü kelerim!
Vatanıma ant eterim
Tek alâ oqucağım!
Menim milliy mektebim –
Menim evim ve yerim!
Yıllar keçer, körüşmekçün
Saña qaytıp kelerim!
Menim milliy mektebim,
Qıymetli ocalarım!
Bütün ömür siz bizlernen.
Sağ oluñız, deycegim!
Vatan içün, millet içün
Büyük işler yapasız.
Sizlerge başım egem,
Fedakâr ocalarım!
Ahtem Ali