QIRIMNIÑ QOBALARI

QIZIL QOBA

Qırımnıñ eñ büyük qobasıdır (52600m²). Çatır-Dağnıñ eteginde yerleşken. Onıñ tübünden Suv-uçqan özeni aqa. Eski zamanlarda bu qobada qadimiy insanlar yaşağan.

 

MERMER-QOBA

Dünyada eñ dülber qobadır. O da Çatırdağnıñ eteginde yerleşken. İçindeki taşlar masal qaramanlarını añdıra. Dülberden-dülber taş uçansuvları ve perdeleri, göller ve incige oşağan qumları onı Avropada eñ tanılğan qobalardan biri yapa.

 

EMİNE-BAİR-HOSAR

Avropanıñ eñ mücizeli qobalarından biri. Çatır-Dağnıñ eteginde yerleşken. Onıñ içinde paleontologiya müzeyi bar, çünki mında pek çoq mamont, tüklü kerkedan, qoba arslanı ve diger qadimiy ayvanlarnıñ kemikleri yahşı saqlanğan.

 

SKELE QOBASI

Qırımda eñ yüksek qobalardan biridir. Onıñ içine doquz qatlı ev sığa bile. Baydar vadiysiniñ dağlarında yerleşken. Bu qoba suvnen yuvıp çıqarılmağan – o, küçlü zelzele vaqtında yer çatlağanda peyda oldı.

 

KİYİK-QOBA

Dünyada belli olğan qobalardan biri, çünki bu insanlar yaşağan eñ qadimiy yer. O, Qırımda adamlar 100 biñ yıl evel peyda olğanını isbatlay. İçinde pek çoq avda öldürilgen ayvanlarnıñ ve çeşit quşlarnıñ kemikleri, qadimiy insanlarnıñ emek aletleri tapıldı. Bu qoba Zuya qasabasınıñ civarında yerleşken.

 

TÜPSÜZ-HOSAR

Qırımda eñ teren quyudır. Qurt Bair yanında, Çatır-Dağnıñ eteginde yerde çuqur açıla. Tübüne tüşmek içün 195 metr yip kerek. Yazda bile içinde buz ola.

 

ÜÇ UCLU-HOSAR

Eñ tik qoba. Onıñ içine kirmek içün quyuğa enmek kerek. İçindeki qobalar qat-qat tüşeler. Çatır-Dağnıñ eteginde, Tüpsüz-Hosar yanında yerleşe.

 

GÖGERCİN-QOBA

Eñ yükseklikte (deñiz boyundan 785m) yerleşken qoba. Qızıl-Qobannıñ töpesinde, dağ içindedir. Kirmek içün quyuğa enesiñ. İçindeki büyük qoba altı odağa bölünşgen. Tübünde gölçikler bar.

 

ALİM QOBASI

Halqımız arasında eñ meşur qoba, çünki mında qırım yigiti, efsaneviy Alim-Aydamaq çar jandarmlarından saqlana edi. Kirişindeki büyük taşlar ana-mına tüşip ezerim, dep tura. Onıñ içün adamlar içine kirmege saqınğan. Qoba Aqmescitniñ civarında yerlerşken.