Дост – бу буюк байлыкъ. Достлукънынъ къадрини бильмек керек. Дост арттырмакъ къолай, амма сакълап къалмакъ къыйын. Бу адий къаиделер боюнджа яшасанъ, достларынъ эр вакъыт янынъда олур.
Достларынънен, атта олар сенден баягъы кучюк олса биле, селямлашмагъа унутма. Эм кучюк ве акъранларнен, эм къыз ве огъланларнен дост олмакъ керек.
Эгер достунъа джанынъ агъыргъан олса, оны багъышламагъа ве джан агъырсыны унутмагъа тырыш. Ачувланма! Кин тутма!
Аркъадашларынънен къаба лаф этме. Ярамай сёзлер айтма. Чешит лагъаплар такъма.
Достунъдан китап я да оюнджакъ алсанъ, бу шейлерге мукъайт ол эм оларны вакътында къайтармагъа унутма.
Достунъ сенден бир де-бир оюнджакъ я да китап сораса, ёкъ деме. Къызгъанма!
Озюнъ ичюн онъайтлы ер аладжакъ олып, давалашма, котеклешме.