Skip to main content

КЪЫРЫМ УЧАНСУВЛАРЫ

Къырым дагъларынынъ этеклеринде бинълернен чокъракълар ер тюбюнден урып чыкъа, олар ирмакълар ве озенлерни яраталар. Тап тёпеден, къаялардан акъып, учансувлар шырылдай.

Къырымдаки чокъсу учансувлар тек баарьде яратыла, язда исе къуруп кетелер.

Энъ юксек учансувны Ялта шеэрининъ дживарында корьмек мумкюн.

Учан-Су озенчиги 390 метр юксекликтен ашагъы атып, дёрт басамакътан кече ве дёрт: 90 м., 15 м., 7 м., 8 м. – юксекликте олгъан учансувларны ярата.

Энъ чокъ барылгъан учансувны Къызыл-Къоба устюнден акъкъан озен ярата. 25 м юксек-ликтен тюшкен сув астында туристлер ювунмагъа севелер.

Суву энъ номай, джумерт олгъан Джур-Джур учансувы атта энъ сыджакъ язларда къурумай. О, 15 м юксекликтен тюше. Оны корьмек ичюн Улу-Узень коюни кечип, Къарабий яйля тарафына кетмек керек. Джур-Джурнынъ суву яз-къыш – пек салкъын ола. Онынъ ичюн оны даа энъ сувукъ сувлы учансув, демеге мумкюн.

Су-Аткъан – энъ аз яшагъан учансув. Оны тек баарьде, къарлар иригенде бир къач кунь корьмек мумкюн. Язда исе Су-Аткъан озени къуругъаны себебинден учансув олгъан ерде тёпеден тамчылар тюше ве уфакъ гольчикни ярата. Су-Аткъан Бельбек вадийсинде Коклуз (Богатое ущелье) коюнинъ янындадыр.

Энъ номай баарьлик учансувы Коккозь (Соколиное) коюнинъ дживарында, Бойка дагъынынъ устюден акъа. Онынъ тек баарьде, къарлар иригенде бир къач кунь омюри ола.

Энъ дюльбер сайылгъан учансув Алушта янында Яман-Дереге акъа.

Онынъ юксеклиги 12 метр.

Къобалар учансувы энъ догъру сув пердесини ярата ве темиз бир гольчикни мейдангъа кетире. Оны Къобалар-сув ирмагъынынъ Уркуста (Передовое) коюнден 3 км узакълыкъта корьмек мумкюн.

Яузлар озенинде пек юксек олмагъан, лякин энъ кучьлю эки учансув 6 м юксекликтен ата. Сув номай кельгенде о ойле кучьлю ура ки, тюбдеки томалакъ ташлар къаягъа ышкъыланып, таш ичинде оюкълар япа. Нетиджеде, Ашагъы Яузлар учансувы тюбюнде буюктен-буюк къазан яратылды.

Энъ романтик денильген учансув Арпат коюнинъ янында. Джунджур озени ташларны ойле бир тегиз ишлеген ки, бу ишни табиат япкъанына зорнен ишанасынъ. Джунджур учансувы 10 м юксекликтен тюше. Кимдир ашагъыда яратылгъан таш къазангъа Севги Тыйнагъы адыны берген.