Табиат эр заман адамны бакъкъан. Чокътан-чокъ пек лезетли ве файдалы емишлер инсаннынъ софрасыны зенгинлештиргенлер. Олар арасында ювез, мушмолла, бурульген, итбурун, къапым тузлукъ, когем ве дигерлери къырымтатарлар ичюн керекли витамин менбасы, халкъ экимлерининъ ярдымджысы олгъанлар. Лякин табиятта инсан ичюн хавфлы емишлер де бар.
Дагъда, этрафымызда оськен ве сиз бильмеген емишлерни ашаманъыз!
Даа догърусы, оларнынъ емишини, япракъларыны, пытакъларыны къолунъызгъа биле алманъыз. Базы осюмликлернинъ, меселя, борсукъ терегининъ инелери ве къабугъы пек зеерли. Базы осюмликлернинъ (бабугъан) чечеклеген вакътында тозу инсанда аллергия, тенинде яныкълар ярата биле. Делимидан, балтатран, тильки юзюми, къозубаш лялеси, гузель киев, чёплеме от, пейгъамбер дёгмесининъ бутюн осюмлиги (тамыры, пытакълары, япракълары, чечеклери, емиши) зеэрли. Балдыран, закъкъум, оймакъ отунынъ ерден тёпедеки къысмы зеерли; сасыкъ от, абселятин отнынъ емишлери ве урлукъларыны ашамакъ олмаз. Къара сарыкъ, копек юзюмининъ емиши ве от къысмына тиймесенъиз, яхшы олур.
Дюльбер олса да, насыл осюмликнинъ емиши олгъаныны бильмесенъиз, яхшысы, дадыны бакъманъыз. Эгер сиз зеэрли емишни ашап, я да япракъларына, къабугъына тийип, башынъыз агъыртмагъа, сыджагъынъыз чыкъмагъа, юрегинъиз буланмагъа башласа, исал тутса, аякъларынъыз тутулмагъа башласа тиббий ярдым къыдырынъыз. Аджеле ярдым кельгендже, къусмагъа, миденъизни ювмагъа тырышынъыз. Ичкен сувунъызгъа, олса, комюр аплары (активированный уголь) къошунъыз. Ичек бошаткъан, юрек иляджлары да ичмеге мумкюн. Зеерленген алда мытлакъа экимлернинъ ярдымы керек ола.