Skip to main content

КЪУРБАН БАЙРАМ

Мусульманларнынъ энъ буюк байрамларындан бири – Къурбан байрам. Бу куню олар сабадан байрам намазына баралар. Сонъра исе эвге къайтып, байрам япалар, мусафирликке баралар. Къартана-къартбабаларыны хайырламагъа, къолларыны алмагъа бу куню мытлакъа керек.

Къурбан байрамы куньлери даа бир адет бар – къурбан чалмакъ. Бу къой я да ири мал соймакътыр. Не ичюн бойле япыла?

Эвель заманларда Ибраим пейгъамберимиз (алейхи селям) тюш коре. Мелек келип, онъа огълуны къурбан кетирмек керек олгъаныны айта. Пейгъамбер Алланынъ эмирини ерине кетирмеге азырлана. Огълу Исмаил да Алланынъ эмирине бойсуна, бабасына ярдым эте.

Пейгъамбер пычагъыны Исмаилнинъ богъазына кетиргенде, пычакъ кесмей. О шашып, пычагъыны къаягъа ура, къая ачыла ве ичинден къой чыкъа. Алла Ибраим пейгъамбернинъ (а.с.)  иманы ве сабырыны сынады. Алланынъ эмирини ерине кетирмеге азыр олгъаны ичюн онъа къурбанлыкъ айван ба-гъышлагъан.

Къурбан эти учь къысымгъа болюне. Бири озь къорантасына, экинджисини къомшу ве сой-сопларына, учюнджиси исе фукъаре къоранталаргъа, балалары олма­гъан къартларгъа, хасталаргъа даркъатыла. Чюнки байрам куньлери эр кес къуванмакъ керек.

Бойле этип, Алла мусульманлар бири-бирине мерхаметли олмасыны истегенини бильдире.

Сиз де, балалар, сабырлы мусульман олунъыз!

  1. Ана-бабанъызны урьмет этинъиз ве сёзлеринден чыкъманъыз.
  2. Сизге иш буюргъанда «уф» деменъиз, ишни япынъыз.
  3. Якъынларынъызгъа къычырманъаз, «сагъ ол», «лютфен», «багъышла» киби тылсымлы сёзлерни нуткъунъызгъа кирсетинъиз.
  4. Сой-сопларынъызны эр байрам иле хайырламагъа унутманъыз, къартана-къартбабаларнынъ къолларыны алынъыз.
  5. Эгер сойларынъызнен корюшмеге имкян олмаса, телефон ачынъыз, мектюп язынъыз ве ал-хатырларыны соранъыз.
  6. Вефат эткен сойларынъыз олса, мезарына барып, оны темизленъиз, олюнинъ рухуна дуа окъунъыз.