Дилявер Сеттаров

Дилявер Сеттаров, Миллий академик театримизнинъ етекчи актёри, Украинада нам къазангъан артист.

 

АКЪ МАНЪЛАЙ

Бабам алды манъа тай,

Адын къойдым «Акъ манълай».

Устюне минип кезем,

Эр сёзюмни о анълай.

Тайым кунь-куньден осе,

Джылап берсем пек севе.

Аша, меним тайчыгъым,

Аякъларынъ пекине.

 

Бир йыл кечти арадан…

Достлар, бакъынъ, не олды:

Ады къалды «Акъ манълай»,

Тайым амма ат олды.

 

БАЛЫКЪЧЫ ЭНВЕР

Эр саба къомшум Энвер

Темиз гольге ёл ала.

Къармакълары йылтырай –

Балыкъ тутаджакъ ола.

 

Ама куньлер кечип кете,

Балыкънынъ ады да ёкъ.

Ачувлана балыкъчы –

Четтен кульгенлер пек чокъ.

 

Энвер анълап оламай,

Голь терен, суву да чокъ.

Агъасы деди онъа:

«Кадем, гольде балыкъ ёкъ!».

 

АЛИМЕ

Еди яшлы Алиме

Ана тилини биле.

Достлары оны севе.

Ай! Машалла, Алиме!

 

Байрамларда Алиме

Шиир айтмагъа севе.

Достлары да севине,

Ай! Машалла, Алиме!

 

Оджа олмакъ Алиме,

Оськен сонъ ниетлене.

Достларыны огрете,

Ай! Машалла, Алиме!

 

КОПЕЧИГИМ САРЫБАШ

Копечигим Сарыбаш –

«Ав-ав» десе, берем аш.

Эвимизни къорчалай,

Мен йырласам о, ойнай.

 

«Ав-ав», – деди Сарыбаш,

Къоркъты ондан Селиме.

Копечигимден къоркъма –

О, сени ойле севе.

 

Пек акъыллы Сарыбаш,

Эр шейге о севине.

Таякъ атсам мен четке,

Барып тез-тез кетире.